Treûs djoûs à Paris

C’ è-st-à sèptante qui nos-èstîs
po-z-aler treûs djoûs à Paris.
Quéle afê-ê-re !
Il-èsteût foû timpe å matin,
nos nos r’trovîs ås Guilièmins.
Quéle afê-ê-re !
N’s-avans ‘nn’-alé avou l’ solo,
mins l’ plêve touma vite so nosse dos.
Lêde afê-ê-re !
Ele ni nos qwita qu’ å matin,
nos-èstîs frèh’ come dès harings.
Quéle afê-ê-re !

Nos-’nn’-alîs po nos-amûzer,
creûrîz-ve qu’ on nos-a fêt ovrer.
Quéle afê-ê-re !
On nos-a-d’né dès kèstionères,
tchansons, tchanteûs, d’ oûy èt d’ nawère.
Drole d’ afê-ê-re !
‘N-aveût Langlois èt Mistigri,
wice lès-a-t-on bin s’tu r’kwèri ?
Cès-afê-ê-res !
Li prumî n’ èsteût nin fini,
qu’ ènn’ aveût d’dja deûs d’ apontît.
Dès kèstionè-è-res.
Nos-avans vèyoû l’ “Sacré-keûr”,
seûl’mint so cwate mètes di hôteûr.
Quéle afê-ê-re !
A cåse di tos lès paraplus
èt d’ l’ êwe qui touméve, qué disdut !
Sinte-Mè-è-re !
Lès-årtisses qui fèt vosse pôrtrêt,
fît turtos d’ l’ “aquarelle”, ma fwè.
Qu’ éle afê-ê-re !
Et tot nosse “parcours touristique”,
n’-l’ avans fêt å pas d’ jimnastique.
Quéle afê-ê-re !

A l’ nute, nos-avans s’tu soper,
è qwårtî d’ “Saint-Germain des prés”,
Bone afê-ê-re !
Mins come lès kês èstît nèyîs,
‘n-aveût dès bouchons d’ assotî,
Quéle afê-ê-re !
On rôla bin, in’-eûre èt d’mèy,
å pas d’ ome, divins cisse hèrlêye,
Quéle afê-ê-re !
C’ èst d’vins on “Grec” qui nos sopîs,
tot hoûtant djouwer l’ “sirtaki”.
Bèle afê-ê-re !

Nos nos-avans s’tu pôrminer,
à “Auvers” cåzî ...“les bains de pieds”,
Quéle afê-ê-re !
Nos volîs fé ine èscursion,
mins nos avîs bin ‘l’impression”,
è l’ afê-ê-re !
Qui l’ payîs dès-”imprèssionisses”
èsteût dim’nou on bê frèhis’,
Quéle afê-ê-re !
Lès vôyes, lès prés èstît nèyîs,
èt min.me li machine d’ à Marly.
Quéle afê-ê-re !


Nos volîs veûy, lès teûles d’ årtisse,
qu’ on-a loumé “imprèssionisse”.
Bèle afê-ê-re !
Po çoula, vos l’ sèpez sûr bin,
è l’ gåre d’ Orsay ènnè fêt plin.
Bone afê-ê-re !
Mins qwand n’s-avans volou intrer,
c’ èsteût grève po lès-amplwèyés.
Måle afê-ê-re !
Po nos r’mète di tos nos racros,
n’s-avans fêt Paris è métro.
Quéle afê-ê-re !

Po mète li cèlîhe so l’ wastê,
nos pinsîs aler so batê.
Bèle afê-ê-re !
Rimonter l’ canål St-Mårtin,
po veûy lès guinguètes d’ à Gabin.
Vîle afê-ê-re !
L’ ôtél èt l’ pont wice qu’ Arlèti
à Jouvèt on djoû, aveût dit :
Atmosfêre, atmosfêre ?
Mins come lès-êwes avîz monté,
li batê n’ poléve pus passer,
V’-vèyez l’ afê-ê-re !

Nos ‘nn’ avîs nosse sô di c’ plêve là,
min.me li “zouave” dè pont d’ l’ Alma,
l’ militê-ê-re !
Li pôve sôdård, li vî turcot
aveût d’ l’ êwe à l’ copète dès gn’gnos,
solitê-ê-re !
Avou l’ cår nos-avîs radjoû
so li d’vant dè “centre Pompidou”,
lêde afê-ê-re !
Avou dès tuyaus tos costés,
on s’ dimande çou qu’ on volou fé ?
Françès, mon-frè-è-re !
Nos èstîs binåhes dè rintrer,
dè r’trover lès djeûs d’ sôciété,
tant qu’ à fê-ê-re.
“Françoise n’ aveût pus nos må d’ tièsse,
n’-aveût “Langlois” po nos fé fièsse,
è l’ afê-ê-re !
èt nos tûzîs qu’ è France, ma fwè,
i ploût ot.tant qu’ amon Tchantchès,
min.me afê-ê-re !
i n’ fåt nin cori à Paris,
c’ èst fî parèye qu’ è nosse payîs,
Quéle afê-ê-re !

Dji v’ dîrè qui, mågré çoula,
on s’ a bin plêt, cès treûs djoûs là.
Bone afê-ê-re !
Et nos-èstans d’ acwérd turtos,
po r’mète çoula, min.me si ploût co.
Bèle afê-ê-re !
Ca n’s-èstîs-st-ine bande di copleûs,
l’ infôrmatike nos-a d’né l’ pleû.
so l’ afê-ê-re !
So l’ moumint, on pit’reût bin d’vins,
mins, après, on troûve qu’ on s’ plêt bin.
Avou l’ afê-ê-re !

Lèyon Bukens - Mås’ 2001
Si pout tchanter so l’ êr “La gamelle”

L'Entièreté des Photos de Notre MEGA EXCURSION A PARIS
est visible sur le site de notre photographe Jack Wanson